Кобул аэропортидаги тартибсизликларда камида 10 нафар инсон ҳалок бўлди

Аэропорт маъмуриятининг айтишича, инсонларга рейслардаги мавжуд бўш ўринлар ҳақида нотўғри маълумот берилган ва улар кўпчилик рейслар тўхтатиб қўйилган пайтда аэропортга кириб келишган. Уларнинг кўпчилигини паспорти ҳам бўлмаган.

Бундан аввал афғон ОАВ лари Кобулдан учиб кетаётган АҚШ транспорт учоғидан йиқилиб тушаётган инсонлар ҳақидаги видеони тарқатган эди. Уларнинг учоқ шассиларига тирманиб олиб, Афғонистондан чиқиб кетишга уринаётган афғонлар бўлганликлари тахмин қилинмоқда.

Маҳаллий собиқ маъмур Аҳмадшоҳ Катавазийнинг айтишича, инсонлар ваҳима-қўрқув ичида аэропортга бостириб киришган ва натижада тартибсизликлар туфайли шундай ҳодисалар рўй бермоқда.

“Бу Ашраф Ғани юритган хатоли сиёсат оқибати”, – деди университет ўқитувчиси Ҳамидуллоҳ Масрур.

“Оиламизда 6 кишимиз, бундай вазият туфайли мамлакатдан чиқиб кетишни истаймиз”, – деди Муҳаммад Рабий.

Яна бир Кобуллик, Ҳанифнинг айтишича, у болаларига ҳаттоки овқат олгани ҳам пул тополмаяпти.

Шаҳардаги ваҳима тўла гап-сўзларни бостириш учун Толибон вакиллари инсонларнинг хавфсизлиги улар учун биринчи ўринда эканлигини уқтирмоқда.

“Мен халқимдан хотиржам бўлишни ва ваҳимага берилмасликни илтимос қиламан. Биз бу ерга уларга хизмат қилиш учун келдик”,-деди Толибон қўмондонларидан бири Қори Холид.