O`zbek yozuvchilarining hikoyalari Germaniyada chop etildi

Germaniyada “На земле Заратуштры” (“Zardusht diyorida”) adabiy almanaxi nashr etildi.

O`zbekiston Yozuvchilar uyushmasi Axborot xizmati ma`lumot berishicha, Germaniyaning Xexingen shahrida Lada Baumgarten tahriri ostida nashr etilgan bu kitobdan O`zbekiston Yozuvchilar uyushmasi a`zolari Nikolay Ilin, Risolat Haydarova, Galina Dolgaya va Muhabbat Yo`ldoshevalarning hikoyalari o`rin olgan. 

Almanax “Zardusht diyorida” ma`naviy madaniyat assambleyasi doirasida bo`lib o`tgan ikkita – “Zardusht diyorida” va “Sharq – nozik masala” nomli xalqaro adabiy tanlov g`oliblari va hay`at a`zolarining asarlaridan iborat. Kitob tanlovlarining tashkilotchisi – Yevropa Yozuvchilar gildiyasi qo`llab-quvvatlashi asosida chop etildi.

Tanlovlarda O`zbekiston, Belarus, Belgiya, Germaniya, Litva, Isroil va Germaniyada istiqomat qilayotgan yozuvchilar ishtirok etgan. 
Tanlov yoshi va yashash joyidan qat`i nazar, ishtirok etishni istagan har bir yozuvchi uchun o`z iste`dodini namoyon etishga imkoniyat yaratishga harakat qildi. Asarlarga qo`yilgan bosh talab Sharq an`analari va ma`naviy dunyosini bor go`zalligi bilan ochib berishdan iborat edi. 

Almanaxda Risolat Haydarovaning “Daraxt meva tukkanda”, Galina Dolgayaning “Chag`alay qanotlari”, Nikolay Ilinning “Chapga burilish”, Muhabbat Yo`ldoshevaning “Tungi mehmon” hikoyalari o`rin olgan.


N.Usmonova, O`zA